1. યહોવાની સ્તુતિ કરો, કેમ કે તે ઉત્તમ છે; તેમની કૃપા અનંતકાળ [ટકનાર] છે.
2. દેવોના ઈશ્વરની સ્તુતિ કરો, કેમ કે તેમની કૃપા અનંતકાળ છે.
3. પ્રભુઓના પ્રભુની સ્તુતિ કરો, કેમ કે તેમની કૃપા અનંતકાળ છે.
4. જે એકલા મોટા ચમત્કારો કરનાર છે [તેમની સ્તુતિ કરો], કેમ કે તેમની કૃપા અનંતકાળ છે.
5. જેમણે પોતાના ડહાપણ વડે આકાશો ઉત્પન્ન કર્યાં છે [તેમની સ્તુતિ કરો], કેમ કે તેમની કૃપા અનંતકાળ છે.
6. જેમણે પાણી પર ભૂમિને વિસ્તારી છે [તેમની સ્તુતિ કરો], કેમ કે તેમની કૃપા અનંતકાળ છે.
7. મહાન જ્યોતિઓના બનાવનારની [સ્તુતિ કરો], કેમ કે તેમની કૃપા અનંતકાળ છે.
8. દિવસ પર અમલ કરવાને જેમણે સૂર્ય બનાવ્યો [તેમની સ્તુતિ કરો], કેમ કે તેમની કૃપા અનંતકાળ છે.
9. રાત ઉપર અમલ કરવાને જેમણે ચંદ્ર તથા તારા બનાવ્યા [તેમની સ્તુતિ કરો], કેમ કે તેમની કૃપા અનંતકાળ છે.
10. પ્રથમ જન્મેલાઓને સંહારીને જેમણે મિસરને માર્યો [તેમની સ્તુતિ કરો], કેમ કે તેમની કૃપા અનંતકાળ છે.
11. વળી તેઓની પાસેથી ઇઝરાયલને છોડાવી લાવનારની [સ્તુતિ કરો], કેમ કે તેમની કૃપા અનંતકાળ છે.
12. બળવાન બાહુ તથા લાંબા કરેલા હાથ વડે તેઓને છોડાવી લાવનારની [સ્તુતિ કરો], કેમ કે તેમની કૃપા અનંતકાળ છે.
13. જેમણે લાલ સમુદ્રના બે ભાગ કર્યા [તેમની સ્તુતિ કરો], કેમ કે તેમની કૃપા અનંતકાળ છે.
14. તેની વચ્ચે થઈને ઇઝરાયલને પાર ઉતારનારની [સ્તુતિ કરો], કેમ કે તેમની કૃપા અનંતકાળ છે.
15. ફારુન તથા તેની ફોજને લાલ સમુદ્રમાં ઊથલાવી નાખનારની [સ્તુતિ કરો], કેમ કે તેમની કૃપા અનંતકાળ છે.
16. જેમણે પોતાના લોકોને અરણ્યમાં થઈને દોરી લીધા [તેમની સ્તુતિ કરો], કેમ કે તેમની કૃપા અનંતકાળ છે.
17. મોટા રાજાઓને મારનારની [સ્તુતિ કરો], કેમ કે તેમની કૃપા અનંતકાળ છે.
18. નામાંકિત રાજાઓને સંહારનારની [સ્તુતિ કરો], કેમ કે તેમની કૃપા અનંતકાળ છે.
19. એટલે અમોરીઓના રાજા સિહોનને [સંહારનારની સ્તુતિ કરો], કેમ કે તેમની કૃપા અનંતકાળ છે.
20. તથા બાશાનના રાજા ઓગને [સંહારનારની સ્તુતિ કરો], કેમ કે તેમની કૃપા અનંતકાળ છે.
21. જેમણે તેઓનો દેશ વારસામાં આપ્યો [તેમની સ્તુતિ કરો], કેમ કે તેમની કૃપા અનંતકાળ છે.
22. જેમણે તે પોતાના સેવક ઇઝરાયલને વારસામાં આપ્યો [તેમની સ્તુતિ કરો], કેમ કે તેમની કૃપા અનંતકાળ છે.
23. જેમણે આપણી દીનાવસ્થામાં આપણને સંભાર્યાં [તેમની સ્તુતિ કરો], કેમ કે તેમની કૃપા અનંતકાળ છે.
24. જેમણે આપણા શત્રુઓના હાથમાંથી આપણને છોડાવ્યા છે [તેમની સ્તુતિ કરો], કેમ કે તેમની કૃપા અનંતકાળ છે.
25. જે બધાં પ્રાણીઓને અન્ન આપે છે [તેમની સ્તુતિ કરો], કેમ કે તેમની કૃપા અનંતકાળ છે.
26. આકાશના ઈશ્વરની સ્તુતિ કરો, કેમ કે તેમની કૃપા અનંતકાળ છે.