ગીતશાસ્ત્ર 81 : 1 (GUV)
મુખ્ય ગવૈયાને માટે; રાગ ગિત્તિથ. આસાફનું [ગીત]. ઈશ્વર જે આપણું સામર્થ્ય છે તેમની આગળ મોટેથી ગાઓ; યાકૂબના ઈશ્વરની આગળ હર્ષનાદ કરો.
ગીતશાસ્ત્ર 81 : 2 (GUV)
ગીત ચઢાવો, ઢોલક તથા સિતાર મધુર વીણા સહિત વગાડો.
ગીતશાસ્ત્ર 81 : 3 (GUV)
ચંદ્રદર્શન તેમ પૂનમને સમયે, એટલે આપણા પવિત્ર પર્વને દિવસે, રણશિંગડું વગાડો.
ગીતશાસ્ત્ર 81 : 4 (GUV)
કેમ કે [એમ કરવું] એ ઇઝરાયલને માટે વિધિ છે, તે યાકૂબના ઈશ્વરનો ઠરાવ છે.
ગીતશાસ્ત્ર 81 : 5 (GUV)
તે મિસર દેશની સામે નીકળ્યા ત્યારે તેમણે યૂસફમાં એ સાક્ષી ઠરાવી; હું ઓળખતો નહોતો એવાની વાણી મેં [ત્યાં] સાંભળી.
ગીતશાસ્ત્ર 81 : 6 (GUV)
મેં તેના ખભાનો ભાર ઉતાર્યો; તેના હાથ ટોપલાથી છૂટા થયા.
ગીતશાસ્ત્ર 81 : 7 (GUV)
સંકટમાં તેં પોકાર કર્યો, એટલે મેં તને છોડાવ્યો; ગુપ્તસ્થાનમાંથી ગર્જના દ્વારા મેં તને ઉત્તર આપ્યો; મરીબાનાં પાણી આગળ મેં તારી પરીક્ષા કરી. (સેલાહ)
ગીતશાસ્ત્ર 81 : 8 (GUV)
હે મારા લોકો, સાંભળો, હું તમારી આગળ સાક્ષી પૂરીશ; હે ઇઝરાયલ, જો તું મારું સાંભળે તેઓ કેવું સારું!
ગીતશાસ્ત્ર 81 : 9 (GUV)
તારામાં કોઈ અન્ય દેવ ન હોવો જોઈએ; તું કોઈ પારકા દેવની પૂજા કરીશ નહિ.
ગીતશાસ્ત્ર 81 : 10 (GUV)
તને મિસર દેશમાંથી કાઢી લાવનાર તારો ઈશ્વર યહોવા હું છું; તારું મુખ ઉઘાડ, એટલે તે હું ભરીશ.
ગીતશાસ્ત્ર 81 : 11 (GUV)
પણ મારા લોકોએ મારી વાણી સાંભળી નહિ; ઇઝરાયલે મને ચાહ્યો નહિ.
ગીતશાસ્ત્ર 81 : 12 (GUV)
માટે મેં તેઓને તેમનાં હ્રદયની હઠ પ્રમાણે ચાલવા દીધા કે, તેઓ પોતાની યોજનાઓ પ્રમાણે વર્તે.
ગીતશાસ્ત્ર 81 : 13 (GUV)
મારા લોકો મારું સાંભળે, અને ઇઝરાયલ મારા માર્ગોમાં ચાલે, તો કેવું સારું!
ગીતશાસ્ત્ર 81 : 14 (GUV)
તો તેઓના શત્રુઓને હું જલદી નમાવું, અને તેઓના વૈરીઓ વિરુદ્ધ મારો હાથ ઉપાડું.
ગીતશાસ્ત્ર 81 : 15 (GUV)
યહોવાના દ્વેષીઓ તેને તાબે થાય; પણ તેઓનો સમય સદાકાળ ટકી રહે.
ગીતશાસ્ત્ર 81 : 16 (GUV)
વળી હું ઉત્તમ ઘઉં તેઓને ખવાડું; અને ખડકમાંના મધથી હું તને તૃપ્ત કરું.
❮
❯